Директорот на Управата за финансиска полиција, Слободан Ивановски, учествуваше на трибината „E-evidence со Relevance Blueprint“, организирана од Бирото за јавна безбедност, каде беше презентиран интелигентниот систем BLUEPRINT – современо дигитално решение што овозможува анализа, поврзување и управување со докази во единствен екосистем. Овој иновативен пристап претставува значаен чекор напред во насока на поголема ефикасност, транспарентност и точност при спроведувањето на истрагите и постапките за правда.
Заедно со директорот на Царинската управа, Бобан Николовски и директорот на Бирото за јавна безбедност, Александар Јанев, Ивановски ја истакна подготвеноста и посветеноста на институциите што ги предводат во поддршката и примената на вакви современи решенија. Преку зајакната координација и технолошка поддршка, институциите ќе придонесат кон поефикасен систем во борбата против организираниот криминал и корупцијата.
Имплементацијата на системот BLUEPRINT ќе овозможи подигнување на стандардите во водењето истраги, посигурно прибирање докази и унапредена меѓуинституционална соработка. Ваквите иницијативи претставуваат важен чекор во зајакнување на владеењето на правото и обновување на довербата на граѓаните во институциите.
Со своето активно учество на вакви настани, Управата за финансиска полиција потврдува дека останува посветена на процесот на дигитална трансформација и воведување на иновативни практики кои ја зголемуваат ефикасноста и транспарентноста во работењето. Со интегрирање на нови технологии и системи како BLUEPRINT, Управата ја зацврстува својата улога како клучен фактор во унапредувањето на финансиската безбедност и интегритетот на институциите во државата.
