Директорот на Управата за финансиска полиција, Горан Иванов со свој тим во Виена,Австрија присуствуваше на регионална конференција посветена на формирањето на регионалната компонента на GlobE – Глобалната оперативна мрежа на антикорупциски органи. На настанот, покрај претставниците на Управата за финансиска полиција присуствуваа и делегации  на Јавното обвинителство и Министерството за внатрешни работи на Република Северна Македонија, како и антикорупциски органи од Албанија, Босна и Херцеговина, Црна Гора и Србија.

Претставниците на УНОДЦ им се заблагодарија на присутните за посветеноста и оценија дека со усвојување на Декларацијата за воспоставување на регионална компонента на GlobE мрежата се засилува, а воедно и се продлабочува меѓународната соработка во борбата против корупција и незаконските финансиски текови помеѓу државите во регионот: Северна Македонија, Албанија, Босна и Херцеговина, Црна Гора и Србија. 

Од УНОДЦ дополнија дека и во иднина ќе продолжат со својата поддршка кон државните институции во насока на зајакнување на нивните капацитети.

Заеднички заклучок на сите присутни е дека со потпишување на Декларацијата и блиската соработка во иднина на надлежните органи во регионот може да се постигнат ефикасни резултати во борбата против корупција и незаконските финансиски текови, вклучително и откривање и одземање на незаконски стекнат имот кој произлегува од сторени кривични дела.